The Fisher Quine
Anon

  • She cam' tae a fisher faimily
  • Eichty odd years ago
  • Lived through the wars an' hard times
  • Seen mony watters ebb an' flow
  • Fin she wis young an' bonnie
  • Days that are fresh in her mine'
  • She followed the herrin' drifters
  • Fin she wis a fisher quine.
  • In summer, she wid gan' doon tae Shetland
  • The land o' the midnicht sun
  • Gutted or packit the herrin'
  • In barrels, till each day wis done
  • For 'oors she stood in a' weathers
  • In days that wir dreich or fine
  • Wi' fingers stiff, sair an' gory
  • Fin she wis a fisher quine.
  • At times she wid gan' tae the Orkney Isles
  • Peterheid, the Broch an' Week
  • Lived rough in digs or bothies
  • Times wir hard an' bleak
  • Wi' fingers rowd up wi' clooties
  • Nae manicured an' fine
  • Noo these days seem sae happy
  • Fin she wis a fisher quine.
  • Come Autumn, she geid tae Yarmooth
  • Tae follow the herrin' fleet
  • In dreich cauld misty mornings
  • She wid aften hae a greet
  • The shoals seemed iver endless
  • As they chavved among the brine
  • The herrin' lay 'aroon in millions
  • Fin she wis a fisher quine.
  • The barrels they filled wir countless
  • The 'oors they chavved wir lang
  • They wir aften tired an' hungry
  • They workit for a sang
  • As she looks back on the auld days
  • That still live in her mine'
  • 0 that she wis still guttin' herrin'
  • Fin she wis a young fisher quine.
  • She's noo auld, a lot wiser
  • As she noo reclines in her chair
  • There's nae mony left that are like her
  • The past tae cherish an' care
  • The days o' guttin' the herrin
  • Wi' fingers rowd up wi' cloots
  • Are jist a fond distant memory
  • A' wrapped up in her roots
  • She aye tells us the stories
  • O'the times fresh in her mine'
  • Though she's noo reached her twilicht
  • She is still a fisher quine.
  • The fisher quines cam' frae a' aroon
  • Frae a' the airts that blaw
  • Frae the North Isles tae the mainland
  • The Hebrides an' Stornawa'
  • A' trying tae earn a shillin'
  • Wi'a deft knife in their fingers
  • As they gutted hunners o' crans
  • A' cam' doon the same line
  • A chapter noo written in history
  • Is that o' a fisher quine.
  • Click to return to our Poets' corner